Paribasa Bali Kelas 8

PARIBASA BALI

A.    Teges Paribasa Bali

Wenten sesambatan utawi lian raos sane madue teges pateh ring Paribasa Bali sakadi Basita Paribasa utawi Basita Parihasa, Basa Basita, lan Pralambang. Manut Tinggen lan Simpen Paribasa Bali teges ipun basa rinengga, dados rerasmen wiadin panglengut basa, ri kala mabebaosan kalih magonjakan sareng pasawitran tur kanggen piranti ngamedalang daging pikayuanan kalih pangrasa ritatkala makumpul.

B.     Soroh-soroh Paribasa Bali

Sane ngranjing ring Paribasa Bali, inggih punika:

No	Istilah Bali	Arti Indonesia
1	Sesongan	Pepatah
2	Sasenggakan	Ibarat
3	Sloka	Bidal
4	Sesawangan/Pepindan	Perumpamaan
5	Bebladbadan	Methapora
6	Cacimpedan	Teka-teki
7	Cecangkriman	Teka-teki berbentuk lagu (Pupuh)
8	Sesimbing	Sindiran
9	Cecangkitan	Olok-olokan (Ejekan)
10	Raos Ngempelin	Homonim   (1 Kata memiliki dua arti)
11	Sipta/Sasemon	Allegori
12	Peparikan	Pantun 4 Baris
13	Wewangsalan	Tamsil (Pantun 2 Baris)
14	Gagendingan	Lagu-lagu
15	Sipta	Tanda-tanda Alam
16	Sesapan	Doa

C.    Bladbadan

Bebladbadan, lingganipun "babad", artinipun tutur jati sane sampun kalampahang riin. "Babad", polih seselan "el" = belabad = bladbad, polih pangiring "an" = bladbadan raris kaduipurwayang dados "bebladbadan" artinpun kruna bebasan, kangge papiringan saha madue purwakanti (bersajak). Bebladbadan puniki kawangun antuk lengkara utawi kruna tigang palet. Krunane sane pinih riin apalet dados "giing" (bantang), krunane sane kaping kalih apalet, arti sujati (bebasanipun), sakadi sampiran, sane ngwangun purwakanti (sajak), krunane sane kaping tiga arti paribasa wiadin suksmanipun, upami :

a.       Giing (bantang) : maceleng lua

b.      Arti Sujati (bebasanipun) : bangkung

c.       Arti paribasa (suksmanipun) : bengkung

No	Giing (Bantang)	Arti Sujati (Bebasan)	Arti Paribasa (Suksmanipun)
1.	Majempong bebek	Jambul	Ngambul
2.	Mataluh nyuh	Tombong	Sombong
3.	Mabuah jaka	Beluluk	Nguluk-nguluk
4.	Makunyit dialas	Temu	Matemu
5.	Mabawang putih	Kesuna	Pisuna

D.    Raos Ngempelin

Raos ngempelin punika kruna sane dempet, tegesipun krunane sane asiki madue arti kakalih, sane asiki maarti sejati, sane asiki artinipun ngintar. Raos ngempelin punika pateh sakadi cecangkitan, binanipun wantah akidik, kewanten suksmanipun pateh, wantah mangge rikala magagonjakan kewanten. Ring sor puniki wenten makudang-kudang raos ngempelin :

1.      Memen tiange jani nukangin.

Tegesipun : 1) Nukangin = enu ba dangin, 2) Nukangin = dadi tukang

2.      Silih malu pipise satak tali ento punyan nyuh tiange gisi.

Tegesipun : 1) Gisi = dadi gegaden, 2) Gisi = jemak gisi dogen

E.     Paribasa Bali ring Tembang/Lagu Pop Bali

Lagu pop Bali inggih punika karya sastra sane kawangun antuk puisi Bali anyar miwah katembangin tur nganggen bahasa Bali. Panglimbak lagu pop Bali kakawitin antuk A.A. Made Cakra miwah I Gde Dharma ring warsa 1950-an kantos 1960-an. Daweg punika kakaryanin lagu Pop Bali sane mamurda Merah Putih sane maunteng indik kamarhadikaan miwah politik. Kawentenan lagu pop Bali sayan nglimbak kantos mangkin tur kasenengin antuk krama Baline. Tokoh-tokoh sane nembangang lagu pop Bali sane mangkin minakadi Dek Ulik, A.A. Raka Sidan, Yong Sagita, miwah sane tiosan.

Lagu pop Bali sane marupa gending Mabasa Bali sampun majanten kasenengin antuk krama Bali sinamian, saking alit kantos lingsir. Perindikan punika kanajtenang antuk kawentenan tembang pop Bali sane sampun taler nglimbak ring sekar rare. Punika duaning wenten lagu pop Bali sane katembangang antuk anak alit sane kawastanin lagu pop Bali anak-anak. Kawentenan tembang pop Bali punika kaunggahang ring media massa, minakadi radio miwah televisi. Lagu pop Bali ngamedalang rasa ulangun taler madue parindikan basa, sastra, miwah budaya Baline. Tiosan ring punika, wangun tembang lagu pop Bali madue makudang-kudang unteng (tema) minakadi tresna miwah kahuripan para janane. Puniki sinalih tunggil tembang pop Bali sane kasenengin antuk para janane kantos mangkin. 

Tembang Pop Bali sampun ketah kekeninin, katembangin tur sampun nglimbak ring para masarakat ring Bali. Pinaka conto artis sane sampun kauningin inggih punika Dek Ulik, Anak Agung Raka Sidan, Anak Agung Wirasuta, Widi Widiana tur sane lianan sampun sering kapanggihin ring media elektronik. Sane ngaryanin lirik tembang pop Bali puniki mangda nenten sekadi punika manten tembangnyane, panglimbak sekadi mangkin sampun akeh kadagingin paribasa bali. Tetujone nenten ja tios anggen pariasi lirik tur mangda tetep lestari kawentenan paribasa Baline. Ring sor puniki pacang katelatarang conto lirik tembang pop Bali sane madaging paribasa Bali.

BLADBADAN RING TEMBANG BALI

Ray Peni_Suka Di Hati (Sukawati)

De ngawag iluh ngorang sayang ken beli
De ngawag iluh ngorang demen ken beli
De ngawag iluh ngorang tresna ken beli
Takonang malu asal usul beline
Tempat tanggal lahir beline
Ape demen beline
Oh….ken ken bikas beline sekenang malu
Pang da kanti disubane raga metunangan ditu iluh
Buka bladbadane makamen disunduk maselselan

Reff :
Pang tawang luh…..    beli lekad dini di sukawati
Pang tawang luh…..   gumi sukawati pusat seni di bali
Pang tawang luh …..  urusan seni sing ngidang ngukur ban materi
Sukawati o….o….o….            suka suka di hati           (3X)

RAOS NGEMPELIN RING TEMBANG BALI

Widi Widiana feat Sri Dianawati_Batu Akik

Jani mula zamane batu akik
Yen sing ngelah batu akik
Sing kone gaul luh
Sing kone keren luh
Beli kel pesu malu ngosok batu...

Batu dogen urus bli

Sewai wai tusing taen prai
De dogen ne boya-boya
Ne gosok beli
Yening dadi
Mapet gosokang jep batun tiange
Tiang masih ngelah koleksi

Reff :
Beli ngelah akik,
akik les kelor
Mantap khasiatne luh
(Bih batu ape to bli?)
Jani pang iluh nawang
Ne ngranayang iluh lelor ken beli

Paekin beli 

tiang nglah batu akik
Widuri bulan bli
(Anggon gene to luh?)
Salukang di jrijin tiang
Sinah jegeg tiange care bulan

Ne buin bli ngelah
Batu akik madu
Luung khasiatne luh
(Ape khasiatne bli?)
Apang iluh sing ngambul
Apang iluh sing galak

Yen alihang bli madu

Tiang masih ngelah

Batu akik selem bengah

Batu bulitan bli

(Ahh batu biasa to luh!)

Liu anak ngorahang

Ene batu meranen

(Anggon ape to luh?)

Anggo nimpug beli ...

DAFTAR PUSTAKA

Buku Penunjang Bahasa Bali Kelas VIII Tahun Pelajaran 2016/2017

http://demenlagubali.blogspot.com/2016/05/lirik-widi-widiana-feat-sri-dianawati.html (Diakses Tanggal, 19 April 2020)

http://bliyanbelog.blogspot.com/2012/02/ray-peni-suka-di-hati-sukawati.html (Diakses Tanggal, 19 April 2020)