Pupulan Pidarta

NGRAJEGANG SENI LAN BUDAYA BALI

Matur suksma ring pangénter acara antuk galahé sané kapaica ring sikian titiang.

Para Déwan Juri sané dahat wangiang titiang,

Para Angga Panuntun sané kusumayang titiang,

Taler Para Pamilet Lomba Pidarta sané tresna asihin titiang.

Maduluran manah hening nirmala, tan mari titiang ngluhurang rasa pangayubagia ring Ida Sang Hyang Widhi Wasa, malarapan antuk nguncarang pangastungkara “Om Swastyastu”.

Ring galahé sané becik puniki, titiang jagi ngaturang pidarta sané mamurda “Ngrajegang Seni Lan Budaya Bali”.

Napi mawinan titiang ngambil murda kadi asapunika, duaning rauh mangkin pulau Baliné kaangkénin pinaka Pulau Dewata, Pulau Khayangn, Pulau Seribu Pura, miwah Pulau Sorga. Tiosan punika kabaos pulau Seni Budaya. Ri sajeroning niténin pulau Baliné punika Pulau Seni Budaya, guru wisésa sayaga nglanturang sepat siku-siku sané karincikin olih Ida Dewata Prof. Ida Bagus Mantra mlarapan ngmargiang Pésta Kesenian Bali nyabran warsa. Mangkin, rikala iraga sareng sami ngarepin aab jagat sané kabaos era global, saha maweweh krisis global, sampun majanten pacang akéh keni ius sané nénten becik antuk ring kawéntenan seni lan budaya Baliné.

Yéning uratiang becik-becik, sampun akéh seni lan budaya druwéné katibén pikobet sané nénten becik, luir ipun ; kawéntenan seni tari sané sampun ninggalin pakem-pakem seni sané asli. Taler wénten pailen seni komersial sané matetujon wantah merihang arta brana. Punika mawinan pacang mapuara kaon, pacang prasida ngawinang taksu adiluhung seni budaya Baliné sayan-sayan rered ring jagaté.

Ring widang tetamian warisan, taler keni pikobet sané nénten becik, sampun wénten para jana Baliné sané nglaliang pidabdabé “Sutindih ring Tanah Pamijilan”. Sampun akéh tanah tegal lan carik kaadol ring wong duranegara, mawastu pacang sayan telas wewidangan jagat Baliné. Wénten malih krama Baliné sané sampun nénten uning ring tetuek maagama Hindu, mawinan nénten prasida nginutin katatwaning sastra agama. Yéning nénten gelis pikobeté punika katepasin, ajerih manah titiang pacang mawastu sayan rered Bali druwéné.

Ida dané sinamian sané wangiang titiang, Kahuripan para jana Baliné ketah ngamedalang séktor pariwisata budaya. Punika mawinan titiang nunas pikayunan para yowana baliné mangda sayaga ngaremba lelingsir druéné ngrajegang budaya Baliné. Sané mangkin ngiring baosang sapunapi tata carané mangda budaya Baliné prasida rajeg kantos ka pungkur wekas?

Yéning kamanah antuk titiang nénten wénten pamargi tiosan sané katiténin, sajaba iraga patut mawali kajati angga druéné, mabalik sumpah ring manah soang-soang, mikukuhin budaya Baliné antuk nelebang ajahan agama Hinduné pinaka jiwatman budaya Baliné. Ngiring sayaga ngamargiang dasar-dasar kahuripan, luir ipun :

1.      Mikukuhin tur ngrajegang Sang Hyang Agama saha nglimbakang tan prawertining magama Hindu.

2.      Ngrajegang tata kasukertaning jagat, sané mapiteges mangda sareng sami miara tata sukerta manut ring loka dresta, kuno dresta , miwah sastra dresta.

3.      Nincapang pangweruh miwah kasusilan maka piranting ngrajegang seni lan budaya druéné, taler anggen bekel ngruruh pangupajiwa.

Ida dane sinamian sané mustikayang titiang. Yéning baosang ring kauripan masyarakat Bali wénten punika kabaos sekaa truni, mangda patut tatas ring daging awig-awig sekaa truniné, nginggilang pasuka dukan. Mangda prasida iraga saling asah asih asuh, pakedek pakenyung, sagilik saguluk salulung sabayantaka, paras paros sarpanaya. Ngiring becikang ngruruh sawitra, sampunang pisan masuwitra ring anaké sané kecanduan obat-obatan terlarang utawi Narkoba.

Sajaba punika, swadharma pinaka yowana mangda jemet mlajahang raga. Ngiring iraga pinaka para yowana mangda sida mautsaha ngruruh kawikanan tur kaweruhan jagat. Yéning punika titenin sareng sami, sinanggeh pacang sida kabaos generasi sané wikan tur wicaksana. Yéning wikan maweweh wicaksana, pacang metu wibawa, mawinan Ida dané pacang sida “Ing arso song tulodo, ing madya mangun karsa, tut wuri handayani”. Sané mateges ring ajeng pinaka tetuladan, ring tengah sareng makarya, ring ungkur ngicenin motivasi mangda sida ngamolihang gawé, sané ngulati masyarakat adil miwah makmur

Inggih Ida dané sinamian sané kusumayang titiang.

Napi luir sané sampun katur iwawu prasida kacutetang kadi asapuniki :

1.      Mangda sida ajeg seni lan budaya Bali, patut iraga krama Bali sareng sami éling ring angga soang-soang sutindih ring tanah pamijilan.

2.      Krama Baliné sareng sami mangda sida raris nyaga turmaning miara tanah palemahanné sane marupa warisan leluhur iragané daweg dumun.

3.      Ring para yowana Baline pinaka generasi muda mangda tetep nyadia mlajahang angga turmaning ngadohin sané mawasta Narkoba.

Ida dané sinamian sané tresna asihin titiang. Wantah sakadi punika prasida titiang matur ring galahé sané becik puniki. Mogi-mogi wénten pikenohipun. “Klungkung Semarapura, ngabas bet titian ring pétang”. “Kirang langkung nunas ampura, antuk tambet titiang kalintang”. Puputang titiang antuk parama santih.

“Om Santih Santih Santih Om”

YASA KÉRTI PARA YOWANA SAJERONING NGRAJEGANG JAGAT BALI

Ida dané sareng sami pamekas ring panuréksa sané dahat kusumayang titiang, para panodia, pamilet lomba mapidarta Basa Bali sawewi- dangan Kota Denpasar, saha para sisia, lan para yowana sané banget tresna sihin titiang. Sadurung titiang nglanturang matur amatra, pinih riin ngiring sareng-sareng ngastiti bakti ring Hyang Widhi, majalaran antuk panganjali:

“Om Swastyastu”

Mogi-mogi  sangkaning sih  pasuécan lan asung kerta waranugrahan Ida Sang  Hyang Widhi, prasida titiang ngiring ida dané sareng sami gumanti sida ngamanggehang karahayuan, tur titiang prasida taler ngamolihang sidaning don. Ring tepengané utawi galah sané becik puniki, ri tatkala nyarengin lomba pidarta basa Bali puniki, lugrayang titiang matur amatra, marupa pidarta sané mamurdha “YASA KÉRTI PARA YOWANA SAJERONING NGRAJEGANG JAGAT BALI”.

Ida dané sareng sami sané wangiang titiang, mawit saking murda punika, tincapang titiang malih ring kawéntenan Basa Baliné, untengnyané wantah saking kawéntenan basa Baliné mangda sida taler ngrajegang budaya Bali punika pinaka yasa kértin i ragané sareng sami ngrajegang budaya lan agamané ring Bali. Sané mangkin, yén i raga kayun-kayunin tur uratiang indik kawéntenan aab jagaté , napi malih kawéntenan aab jagat sané wénten ring Bali,  sawiakti pisan akéh sané sampun mauah, manut pakibeh jagaté, taler akéh sané sampun lémpas saking tata titi krama sané sampun nglimbak saking nguni-nguni, utamannyané indik sasana, sané pastika punika wénten pakililitanipunné sareng basa Bali ring pakraman.

Yéning iraga sawiakti jagi ngrajegang budaya Baliné, saking basa dumun pangawitnyané. Napi mawinan asapunika, riantukan basa punika pinaka taksu taler mahkota budaya sané nenten dados kalémpasin. Nanging sané  mangkin sakadiné sinamian punika  sampun matungkalik, kawéntenannyané  sayan surud. Punika sané mawinan akéh para yowanané kimud utawi lek matur nganggé basa Bali sané sawiakti punika pinaka  jati diri anaké sané mabudaya Bali.

Rerehang mangkin ring aab jagaté, kawéntenan jagaté sampun sayan mraktisang, napi-napi mangkin sampun sayan aluh ngrereh. Nika mawinan para kramané utamannyané para yowana sayan ngamayusang malajahang raga, napi malih nagingin padéwékan antuk pangweruhan. Akéhan sampun kakuub antuk kawentenan sakala kémanten, dadosné arang sané nelebang daging sastra, tur panglimbak basa Baliné.

Yén rerehang ring daging piteket Ida Padanda Made Sidemen, sané ketusang titiang saking kakawian Ida né sané mamurda “salampah laku”, sané dagingnyané “……tong ngelah karang,  karang awaké tandurin”. Daging piteket idané punika sawiakti mabuat pisan, yén i raga ri tepengan mangkin sampun nénten madué karang utawi tanah anggén ngrereh pangupajiwa, karang awaké sané katandurin antuk pangaweruhan, mangdané riwekasan sida ngrereh sané mawasta kajagathitan.

Sane mangkin akéhan sampun tan manut ring daging piteket idané, napi mawinan, yén bandingan sareng kawéntenan kramané ring Bali, akéhang sampun mangkin ngadol tanahipuné, tur mayus ipun malajah nagingin déwékipuné mangdané sida kaanggén ngruruh pangupa jiwa. Napi malih tanah ipunné kaadol kaanggén biaya upacara sané ageng-ageng, punika sané mawinan sungsut manah titiang nyingakin kawéntenan budaya lan agamané mangkin ring Bali.

Sané mangkin ngiring patuté rereh, mangdané dados kaanggén i raga sareng  sami sesuluh idup, yadiastun punika i raga kakuub antuk jaman, sané mawasta jaman teknologi, i raga sané meneng ring Bali patut mangda satata nindihin kaajegang budayané punika. Ngiring ja saking mangkin mawali iraga nganggé basa Bali, ring dija ja punika, yén sampun asapunika, nika sané kaanggé yasa kérti nyarengin ngrajegang budaya Bali né.

Sané mangkin pamekasnyané para yowana, napi malih sané kari masekolah nénten dados lémpas ring kabudayan Bali sané katami olih para panglingsir sané sajati adiluhung, utamannyané basa Bali sané pinaka dasar tur mahkota kabudayan Bali. Napi mawinan, ri antukan basa Bali punika pinaka taksu Bali, yén kanti basa Baliné punika ngreredang utawi ngedikang para kramané uning nganggé basa Bali, punika sané jagi ngranayang runtuh taksun Baliné.

Punika mawinan, ring galahé sané becik puniki, titiang meled matur ring ida dané sinamian, mangda ngawit saking basa Bali i raga ngrajegang budaya Baliné, mangda satata jejeg tur mamargi antar ngwangun sakancan budaya sané wénten ring Bali. Tetujonnyané wantah nénten lian ngrajegang budaya Baliné.

Ida dané para pamilet sané tresna sihin titiang.         

Budaya Bali yan tanpa kadasarin antuk basa, sinah tetuek utawi rasa basa kabudayannyané ical. Sané jejehang i raga kasuén-suén  yan pamrintah nénten sujati  nguratiang kawéntenan basa i ragané puniki  sinah basa Bali puniki dados basa pasif sané nénten karesepang malih olih para yowana wekasan.

Sané mangkin sapunapi antuk i raga mangdané basa Bali punika tetep ajeg ngwangun budayané. Wantah yén sida antuk iraga mangda nglanturang napi sané katami, napi ké punika marupa kasusastraan : mageguritan, makidung, makekawin, sakadi sané sampun limbak ring pakraman utawi nyatuayang malih daging satua-satua  sané akéh muat tutur. Tur sané dados manahang titiang yan sida antuk pamrintah nglugrayang wantah sapunapi basa Baliné puniki sida kanggén ring sajroning paplajahan. Utamannyané paplajahan muatan lokal. Dadosné mangda pamrintah utawi sané mrasa  peduli sida ngembasang buku-buku mata pelajaran nganggé basa Bali, yén sida antuk asapunika, pastika basa Baliné nénten dados basa asing ring wewidangannyané sakadi sané karasayang i raga mangkin.

Inggih sadurung titiang muputang atur, ngiring tincapang guna widya kaweruhané soang-soang utamannyané nganggé basa Bali anggén mikukuhang tur ngrajegang budaya Baliné. Inggih wantah asapunika prasida antuk titiang matur amatra, manawi wénten sané tan manut ring arsa, sakadi unjuk lungsur, anggah ungguhing basa, titiang nunas geng rena sinampura. Untatin titiang antuk  parama shanti.

Om Shantih Shantih Shantih Om.

                                                                        Karipta olih ; Aryya Paduhungan

PIDARTA BASA BALI

“NGRAJEGANG BUDAYA BALINÉ MALARAPAN ANTUK TRI HITA KARANA”

Matur suksma ring pangénter acara antuk galahé sané kapaica ring sikian titiang.

Para Déwan Juri sané dahat wangiang titiang,

Para Angga Panuntun sané kusumayang titiang,

Taler Para Pamilet Lomba Pidarta sané tresna asihin titiang.

Maduluran manah hening nirmala, tan mari titiang ngluhurang rasa pangayubagia ring Ida Sang Hyang Widhi Wasa, malarapan antuk nguncarang pangastungkara “Om Swastyastu”.

Ring galahé sané becik puniki, titiang jagi ngaturang pidarta sané mamurda “Ngrajegang Budaya Baliné Malarapan antuk Tri Hita Karana”. Napi mawinan titiang ngambil murda kadi asapunika? Santukan ring pakibeh jagaté mangkin, utsaha ngrajegang budaya Baliné sampun karasayang sayan rered. Yadiastun kaangkenin, indik kautaman jagat Baliné, kasub-kaloktah malarapan Budaya Baliné, kantun titiang marasa sumenia. Napi ké sujati, Budaya sané wénten ring Bali pinaka pamikukuh jagat Baliné? Yéning sayuakti, sampun ké para yowanané milet ngrajegang budayané? Inggih, mogi-mogi sampun.

Ida dané sinamian sané singgihin titiang. Sakadi kawikanin sareng sami, jagat Baliné sampun kasub, kasumbungang rauh ring dura negari. Makadi wénten sané maosang “Pulau Seni Budaya, Pulau Dewata, Pulau Kahyangan, Pulau Seribu Pura, miwah Pulau Sorga”. Kabaos asapunika santukan kaasrian jagat Baliné tan samén ring jagaté. Maweweh raris kauripan krama Baliné sané kumanyama, ngupapira budaya adiluhung sané kapramanain antuk ajahan agama Hindu.

Ida dané sinamian sané kusumayang titiang. Midartayang rajeg Bali, sayuakti marupa pabuat sané dahat mautama. Tatujonipun, mangda pawangunan jagat Baliné kapungkur wekas, nénten lémpas ring tatwaning Tri Hita Karana. Tri Hita Karana inggih punika tatiga sané ngranayang iraga manggihin karahayuan. Tri Hita Karana wiakti marupa sepat siku-siku mikukuhin tatwa parhyangan, pawongan miwah palemahan. Ring widang parhyangan krama Baliné setata mikukuhin sradha bakti ring Ida Sang Hyang Widhi. Ring widang pawongan, krama Baliné nginggilang hurip pasuka-dukan, sagilik-saguluk, salunglung sabayantaka, mangda molihang kahuripan sané santi jagathita. Raris ring widang palemahan, setata teleb ngupapira bhuana agung malarapan antuk ngamargiang bhuta yadnya.

Tri Hita Karana punika sané kanggén krama Baliné ngrajegang jagat Baliné. Yéning iraga sampun teleb ngastiti ring Ida Sang Hyang Widhi sampun pastika parisolah krama Baliné mamargi becik. Asapunika taler ring sasamén krama Bali sampun saling asah, asih lan asuh, punika mawinan jagat Baliné trepti. Ring wewidangan genah taler asapunika patut iraga ngupapira pakarangan soang-soang mangda tetep resik lan asri.

Inggih Ida dané sinamian sané wangiang titiang. Yéning inargamayang jagat Baliné pinaka tetanduran taru ageng, aksara, basa lan sastra Baliné pinaka akahipun. Akah sané subur pacang ngwetuang pancer sané kukuh. Wawu raris metu daun lan sekar sané nirgamayang titiang pinaka Budaya Baliné. Yéning iraga sampun teleb ngupapira akah lan pacer punika, majanten tetanduran druené pacang masekar tur mawoh. Tegesipun, yéning iraga sampun teleb ngupapira budaya Baliné, majanten pariwisatané pacang antar, mapuara jagat Baliné landuh, sukerta lan santi.

Sané mangkin pakéling titiang, pamekas ring para yowanané makasami. Duaning iraga pinaka warih, pretisentana sané ngwarisin budaya Baliné, Ngiring! Ngiring jagat Baliné sané sampun kasub puniki, tincapang malih kautamanipun! Yéning nénten iraga pacang mabéla pati, nindihin jagat Baliné, ngupapira budaya Baliné, sapasira malih? Pinunas titiang majeng ring para yowana sami, mangda nénten pati lingu ring kautaman budaya Baliné.

Inggih Ida dané sinamian sané kusumayang titiang. Napi luir sané sampun katur iwawu prasida kacutetang kadi asapuniki :

1.      Sané patut ngrajegang jagat Baliné sinalih tunggil budaya Baliné wantah iraga para yowana miwah I krama Bali sareng sami, sané kamanggala antuk sang maraga guru wisésa.

2.      Dasar gegelaran ngrajegang jagat Baliné inggih punika Tri Hita Karana, sané kapramanain antuk ajahan agama Hindu.

Ida dané sinamian sané tresna asihin titiang. Wantah sakadi punika prasida titiang matur ring galahé sané becik puniki. Mogi-mogi wénten pikenohipun. “Klungkung Semarapura, ngabas bet titian ring pétang”. “Kirang langkung nunas ampura, antuk tambet titiang kalintang”. Puputang titiang antuk parama santih.

“Om Santih Santih Santih Om”

PIDARTA BASA BALI

“NGUPAPIRA PALEMAHAN SEKOLAH SAKING LUU PLASTIK”

Kaping ajeng, matur suksma majeng ring pangénter acara antuk galahé sané kapaica ring sikian titiang. Sane dahat  kusumayang titiang, Angga Panureksa Pacentokan Pidarta Bali.

Pamilet Pacentokan Pidarta Bali sane wangiang titiang.

Punika taler ring Ida Dane Pamiarsa sami sane tresnain titiang.

Angayu bagia manah titiang sakadi mangkin santukan prasida ngamiletin acara Pacentokan Pidarta sane dahat mautama sajeroning ngupapira tur nglestariang palemahan jagat Bali inggian palemahan ring sekolah. Pinaka pamungkah atur, lungrayang titiang ngaturang panganjali,  

Om Swastyastu

Inggih, Ida Dane sareng sami sane wangiang titiang, kaping ajeng titiang ngaturang suksmaning manah ring Ida Sang Hyang Widhi Wasa, sane ngawinang titiang prasida masadu ajeng, ngiring Ida Dane sareng sami, ring pacentokan Pidarta Bali puniki. Kawentenan pidarta sane jagi aturang titiang wantah mamurda Ngupapira Palemahan Sekolah Saking Luu Plastik.

Ida Dane sareng sami sane wangiang titiang, utsaha nglestariang palemahan wantah mautama ri kala kabaosang tur kalaksanayang ring aab jagate sakadi mangkin santukan wewidangan palemahan jagate sampun akeh sane nenten manggeh sakadi riin. Kekayuane ring gunung, ring alase, miwah ring tegal-tegalane sampun sayan akedik. Punika taler ring panepi margi agung, sampun sayan akedik kacingak wenten taru sane ngetisin margine. Toyan tukade miwah jlinglingane, pamekasne ring kota, sampun nenten becik malih santukan satata kaangen genah ngayudang limbah kemanten. Polusi saking kendaraan bermotor miwah industri sampun sayan ngakehang kemanten. Napi malih ring aab sane mangkin, palemahan-palemahan ring wewidangan jagat Bali sayan kacemer antuk leluu plastik. Punika duaning, utsaha nglestariang palemahan jagate, pamekas ring jagat Bali, patut kawangun tur kalimbakang. Kawentenan punika taler madulurin ring wacana Bapak Gubernur Bali sane mapikayun mangda prasida “Nangun Sad Kertih Loka Bali”.

Inggih, Ida dane sinamian sane wangiang titiang. Ring galahe sane becik puniki, titiang pacang ngaturang indik sapunapi nika leluu plastik taler utsaha para sisiane ngupapira palemahan sekolah saking leluu plastik. Maosang indik leluu, yening selehin pah-pahannyane kakepah dados kalih marupa leluu organik miwah leluu anorganik. Leluu organik inggih punika leluu sane mawit saking don-donan miwah leluu paon sakadi sisan jukut-jukutan sane prasida berek utawi terurai. Kawentenan leluu organic puniki nenten ngawinang cemer santukan  pacang berek tur prasida kadadosang pupuk kompos.  Leluu anorganik inggih punika leluu sane mawit saking plastik, kaleng, miwah sane tiosan sane nenten prasida berek utawi terurai. Yening selehin, leluu anorganik puniki madue kawigunan sane becik santukan prasida ka-daur ulang tur prasida kaanggen malih. Punika sane ngawinang iraga patut milihin tur milahin leluu puniki mangda prasida mawiguna malih.

Inggih, Ida dane sinamian sane kusumayang titiang. Yening pinehang malih, leluu punika nenten pacang ngamedalang pikobet sane abo ri kala pengolahan-nyane sampun patut tur becik. Kawentenan leluu punika patut kapilahin antuk sorohnyane sakewanten akeh kramane sane nenten ngamargiang parikrama sakadi punika. Dadosnyane medal pikobet-pikobet sane ngawinang palemahan Baline sayan kaon sangkaning leluu utaminipun leluu plastik. Pikobet sane kamedalang antuk leluu plastik punika marupa ngawinang cemer palemahannyane sakadi ring pasih utawi sagara, tukad, miwah ring margi-margine. Leluu plastik ring Bali sayan ngakehang tur ngawinang pikobet sajeroning kahuripan ring Bali.

Inggih, Ida Dane sareng sami sane kusumayang titiang. Yening uratiang malih, leluu plastik punika mawit saking parikrama-parikrama sane kamargiang antuk kramane. Punika taler kapanggihin sajeroning parikrama sane wenten ring sekolah sane akeh nganggen plastik ri kala mungkus beblanjannyane. Tiosan ring punika, soang-soang kantin pastika ngadol ajengan sakadi snack utawi ciki-ciki miwah inum-inuman sane nganggen pamungkus plastik. Yadiastun plastik sane kaanggen sampun nganutin sorohnyane tur dados kaanggen mungkus ajengan utawi minuman, sakewanten tetep kabaos nenten sehat. Napi malih ri kala plastik kaanggen mungkus ajengan sane wawu rateng tur panes. Punika sane ngawinang ajengannyane dados nenten sehat santukan zat kimia sajeroning plastik medal ri kala keni panes.

Inggih, Ida Dane sareng sami sane wangiang titiang. Midabdabin utsaha-utsaha sajeroning pikobet luu plastik punika, sakadi sampun kabaosang ring ajeng, Pemerintah Provinsi Bali pinaka sampun mautsaha antuk ngamedalang Peraturan Gubernur No. 97 Tahun 2018 ngeninin indik ngwatesin nganggé plastik sane kabaos plastik sekali pakai. Punika taler Pemerintah Kota Denpasar, nglanturang medalnyane peraturan gubernur punika, taler sampun ngamedalang Peratuean Walikota No. 36 Warsa 2018 ngeninin indik mangda ngirangin nganggé kantung plastik utawi kresek.

Kawentenan makakalih peraturan punika kasobyahang majeng krama Bali sinamian taler ka sekolah-sekolah sane wenten ring wewidangan Bali. Ring sekolah, kawéntenan kakalih peraturané puniki sampun kasobyahang oleh guru pengajian turmaning sampun kauningayang ring para sisiané mangda prasida ngolah kawéntenan luu plastiké puniki. Tiosan ring punika, adolan ajengan utawi inuman sane prasida kabungkus antuk don utawi kertas taler sampun kamargiang. Punika taler para sisiane wenten sane makta ajengan sane nganggen rantang tur inuman sane nganggen pucung utawi botol saking jerone soang-soang. Pamargi sakadi punika sampun janten prasida nguredang leluu plastik sarahina.

Nguratiang Peraturan Pemerintahé punika, antuk panglimbak aab jagaté sakadi mangkin, wénten utsaha-utsaha pengolahan leluu sané kawastanin program 4R sane marupa replace, reduce, reuse, miwah recyle. Replace inggih punika utsaha ngentosin plastik antuk soroh bahan sané sida terurai ring alam. Reduce inggih punika risajeroning nganggé plastik patut kakirangin, Reuse inggih punika luu plastik sané sampun wénten patut kawigunayang malih. Recyle inggih punika mendaur ulang luu plastik manadados barang-barang sané sida kaanggén olih parajanané sami. Sinalih tunggilnyane sakadi ngaryanin kerajinan marupa genah alat tulis, motor-motoran, celengan, tas, miwah sané lianan tatakan bungan saking kemasan plastik ajengan utawi inuman.

Inggih Ida dané sinamian sané wangiang titiang. Punika sampun katur utsaha-utsaha saking pemerintah miwah sekolah ritatkala minabdabin luu plastik puniki. Yéning sampun sida program puniki satata kamargiang sinah kapungkur kawekas palemahan sekolahé pacang asri lan lestari. Napi malih ring sekolah sida katandurin taru-taruan sané sida ngatisin para sisiané sami. Antuk punika ngiring, ngiring iraga dados sisia utawi yowana Bali patut nyaga tur ngupapira kaasrian alam Baliné, mawit saking sekolah, mangda nénten kacemerin antuk luu plastik. Yéning nénten iraga sané nyaga alam Baliné puniki sapasira malih? Tiosan ring punika, yéning sampun rumaket tresnan iraga ring palemahane puniki sinah Nangun Sad Kertih Loka Bali sane pinaka pikayunan Pemerintah Provinsi Baline sida kapanggih. Pinunas titiang ring ida dané sareng sami mangda satata ngayatnain palemahan Bali antuk nyaga kaasriannyane.

Inggih, Ida Dane sareng sami sane kusumayang titiang. Napi luir sané sampun katur iwawu prasida kacutetang titiang kadi asapuniki, iraga dados sisia tur yowana Bali patut satinut ring peraturan sane sampun kamedalang indik ngirangin nganggen leluu plastik mangda palemahan Bali sayan asri tur lestari. Wantah sapunika sane prasida aturang titiang ring galahe sane becik puniki. Mogi mogi wenten pikenohipun. Badung Mangupura, kirang langkung titiang nglungsur sinampura. wasananit atur, titiang ngaturang parama santhi.

Om Santih Santih Santih Om

PIDARTA BASA BALI

“BALI SIMBAR PINAKA JALARAN ANGGEN NGRAJEGANG AKSARA BALI”

Matur suksma ring pangénter acara antuk galahé sané kapaica ring sikian titiang.

Para Déwan Juri sané dahat wangiang titiang,

Para Angga Panuntun sané kusumayang titiang,

Taler Para Pamilet Lomba Pidarta sané tresna asihin titiang.

Maduluran manah hening nirmala, tan mari titiang ngluhurang rasa pangayubagia ring Ida Sang Hyang Widhi Wasa, malarapan antuk nguncarang pangastungkara “Om Swastyastu”.

Ring galahé sané becik puniki, titiang jagi ngaturang pidarta sané mamurda “Bali Simbar Pinaka Jalaran Anggén Ngrajegang Aksara Bali”. Napi mawinan titiang ngambil murda kadi asapunika? Santukan jagaté mangkin sané kabaos aor tanpa wates, kawéntenan Aksara Baliné sayan rered kaanggén olih I krama Bali. Yadiastun kaangkenin, kaluihan Aksara Baliné punika, kaanggén nyurat simbul-simbul agama Hindu sekadi rerajahan, ulap-ulap, karya sastra miwah sané lianan.

Ida dané sinamian sané singgihin titiang. Sakadi kawikanin sareng sami, rikala maosang Aksara Bali akéhan sampun masarakat Bali sané nénten pati lingu turmaning maosang yéning malajah Aksara Bali punika kabaos tenget. Kabaos tenget santukan kawéntenan Aksara Bali punika akéh sané kapanggihin ring Lontar-lontar miwah karya sastra Baliné. Antuk punika raris akéhan krama Baliné sané mangkin aran pisan malajahin Aksara Baliné puniki. Yéning sampun aran krama Baliné sané mlajahin Aksara Baliné janten kawéntenan Aksara puniki pacang ical ring jagaté, napi malih indik panglimbak teknologi sekadi mangkiné sané sampun canggih turmaning napi sané kasenengin sida gelis kapanggihin.

Ida dané sinamian sané kusumayang titiang. Midartayang Aksara Baliné, sekadi titiang newek dahat mabuat pisan kaanggén ngrajegang Jagat Baliné. Napi mawinan asapunika? Santukan jagat Baliné kasub, kaloktah rauh ring dura negara, nénten lempas ring kawéntenan kabudayan Baliné. Kabudayan Baliné, mangda tetep ajeg patut nguratiang indik Basa, Sastra miwah Aksara Baliné. Yéning inargamayang titiang jagat Baliné pinaka tetanduran taru ageng, Aksara, Basa miwah Sastra Baliné pinaka akahipun. Akah sané subur pacang ngwetuang pancer sané kukuh. Wawu raris metu daun lan sekar sané irgamayang titiang pinaka Budaya Baliné.

Inggih Ida dané sinamian sané wangiang titiang. Ring panglimbak teknologi sekadi mangkin, mangda gelis Aksara Baliné nglimbak olih para ahli Aksara Bali, kabuat punika Program Aplikasi sané kawastanin Bali Simbar. Bali Simbar punika marupa Font Aksara Bali sané matetujon mangda Aksara Baliné sida kasurat ring media Komputer miwah Hp. Antuk perkembangan teknologi puniki krama Baliné pacang nénten malih sukil malajah Aksara Bali, santukan ring dija ja magenah pacang sida malajah nyurat turmaning ngwacén Aksara Bali sané dados kacingakin saking HP miwah Komputer.

Sané mangkin pakéling titiang ring ida dané sareng sami, duaning sampun wénten media kaanggén mapauruk malajah Aksara Bali, ngiring sané mangkin tangiang rasa jengah ring angga sarira, mangda sida i krama Bali sareng sami uning ngwacén tur nyurat Aksara Bali. Sang guru wisésa sané mangkin sampun punika nyobyahang ring Instansi-instansi pemerintah miwah swasta mangda sida kawéntenang Aksara Bali ring plang papan nama kantor sané matetujon mangda ajeg Aksara Bali druwéné. Pamekasnyané para generasi muda sané kabaos generasi melinial ngiring sané mangkin nyurat napi ja saluiring pesan utawi status ring media sosial mangda nganggén Aksara Bali. Yéning nénten iraga pacang mabéla pati, nindihin kaajegan jagat Baliné, ngupapira Aksara Baliné, sapasira malih?

Inggih Ida dané sinamian sané kusumayang titiang. Napi luir sané sampun katur iwawu prasida kacutetang kadi asapuniki :

1.      Sané patut ngrajegang jagat Baliné sinalih tunggil Aksara Baliné wantah iraga I krama Bali sareng sami, sané kamanggala antuk sang maraga guru wisésa.

2.      Kawéntenan Program Bali Simbar pinaka jalaran anggén malajah Aksara Bali mangda dangan antuk ngaresepang.

Ida dané sinamian sané tresna asihin titiang. Wantah sakadi punika prasida titiang matur ring galahé sané becik puniki. Mogi-mogi wénten pikenohipun. “Klungkung Semarapura, ngabas bet titiang ring pétang”. “Kirang langkung nunas ampura, antuk tambet titiang kalintang”. Puputang titiang antuk parama santih.

“Om Santih Santih Santih Om”