WANAGIRI

WANAGIRI

Alasé ring Bali sayan sue sayan nelasang. Wénten sané kaabas kaangén tegalan. Wénten sané keni lahar duk gunungé maletus. Paiketan alas ring gunung wiakti marupa rumaketing pitresnan sané saling tulung. Wénten gunung sané katumbuhin taru ageng ngwéntenang alas wayah genah sakancan satoné magenah. Wénten sato galak ngranayang alasé sayan atub. Santukan arang anaké sané purun ngranjing ka madianing wana. Duaning kawéntenan ipun sakadi punika, pamerintah daerah Bali sampun sayaga-pacang nyaga alasé ring Bali kauh ngwéntenang hutan lindung (alas larangan) antuk pamerintah pusat sané kawastanin : cagar alam. Irika kawéntenang awig-awig mangda genah asapunika tan keni kaolah antuk wong désané sané nampek irika.

Maka pirantining kreta negara patut kadabdabang mangda wénten alas, wénten genah buroné hidup lestari maka sarana kalanduhan negarané. Samaliha jagat Baliné pacang minabdabin pariwisata tumut sareng sami nyarengin malaksana mangda palemahan Baliné kantun asri. Wana wisata inggih punika mangda kawéntenan wisata sané namtamin kabecikan sarwa tumuwuhé sané mentik irika. Kaulangun taruné sané ageng tur alit, mangda nudut kayun sané ngantenang pangrencana sané sampun kamanggehang antuk pamerintah Bali pakantenan ipun sampun becik, duaning kawéntenan kasaimbangang indik : makéh linggah alas, linggah carik, abian. Asapunika taler indik makéh linggah alas prapat sané wénten ring pasisi Bali nampek saking Sanggaran anggén nyaga mangda pasisi kelod jagat Baliné nénten gelis susut miwah abrasi. Antuk alas prapat punika saking riin rauh mangkin kantun kapiara antuk pamerintah miwah sané lianan.

Lian ring indiké punika patut taler kawikanin utsaha saking pamerintah nandur lantoro agung, nandur jambu ménté miwah gamal, punika sami ngulati kalestarian jagaté, mangda tanahé lemek antuk daun ipuné sané aas kasuén-suén dados lemekan. Benjang pungkur yéning wénten sabeh, janten sampun tanahé sané pecak akéh aasan daunan mrasidayang nyimpen toyané sabeh tur mokoh. Punika sami pacang ngwangun pawiwitan tumbuh sarwa taru sané alit. ageng sané pacang ngwangun alas wana tur sida ngicalang gunungé sané gundul dados bet. Wanagiri sané bet pacang nglanduhang toya ring carik. Ngakéhang toyan danu ngagengang toyan tukad tur cariké pasti landuh.

Ring jagat Bali wénten alasé sané kawastanin alas pinus, alas cemara, alas jati, alas bekul, alas wayah, lan alas angker. Alas cemara akéhan sané wénten ring kecamatan Kintamani, alas jati wénten ring bukit Badung. Alas punika patut kapiara. Sané riin wénten alas sané tenget antuk kagenahin buron galak wiadin genahé madurgama sering kawastanin alas angker, inggih punika alas sané atub tur tenget madurgama. Wiakti wantah ngulangunin pisan yening wénten wisata wana, napi malih wénten wanagiri sané katumbuhin antuk taru tangi, sabo, miwah taru-taru sané masekar ngulangunin, napi malih masekar ngulangunin, napi malih risedek ipun nedeng masekar.

Kaketus saking: Sarwa Sari