DALEM BALINGKANG

DALEM BALINGKANG

            Kacrita duk riin ring jagat Bali, madeg prabu utama maparab Sang Prabu Jaya Pangus. Purinida magenah ring Panarajon. Ida Sang Prabu wicaksana pisan ngénter jagat. Daweg punika wénten jatma cina sareng oka istri asiki maparab Kang Cing Wi. Tetujoné rauh mriki pacang madolan. Santukan jegég né Kang Cing Wi mawinan Ida Sang Prabu lulut asih. Raris bagawantan ida matur paungu,”Inggih ratu sang prabu murdan jagat, titiang  nglungsur ring angan i ratu sampunang marabi sareng Kang Cing Wi, santukan drestané driki ten matutang. Saking nguni nénten matutang ngambil rabi cina. Élingang pisan indiké punika Ratu”.  Ida Sang Prabu raris gelis manyawis,”Inggih Ratu Bagawanta sané mautama, yan indik drestané jagi baosang, drestan jagat Bali kabaos méweh pisan, ketah kabaos ngawinang kadat  pamargi. Inggih, cutet mangkin Kang Cing Wi ambil titiang  anggén rabi “. Ida Bagawanta raris digelis nyawis. Yan Ratu purun murug drestan jagat, janten bayané panggih Ratu, raris  ida Bagawanta matilar saking puri.

            Ida Sang Prabu akedik nénten ajerih, yadiastun kawastonin sapunika. Raris Ida nitah panjaké maka sami makarya yadnya wiwaha. Gelising crita, ri sampuné ida wusan natab pawiwahan, tan pasangkan wénten cihna sané kaon, tedun sabeh maduluran krébék kuug pamuput metu blabar ageng raris nganyudang purinida, tur akéh panjaké ngemasin urip. Santukan puriné telas anyudang blabar, raris ida nuju jagat Balingkang. Irika Ida nangun puri tur nabdabang panjak. Krana sampun sué Ida nénten madué oka, raris Ida nangun kérti ring puncak Gunung Batur. Irika wénten gua ageng tur becik pisan anggén genah mayoga. Kagiat pisan ida nyingak, sagét wénten anak istri jegég, jeg pramangkin ical tetujon ida nangun yoga semadi. Ida Sang prabu raris matakén” sapasira parab jeroné, dados wénten  iriki?” Anaké istri punika digelis nyaurin. Peséngan tiangé Dewi Danu, iriki sampun ring gunung Batur purin tiangé. Titiang meled taler mangda uning ring jeroné. Sapasira ragané dados rauh mriki? Ida Sang Prabu raris ngéka daya. Titiang  madan Dalem Balingkang, Tetujon tiangé rauh mriki tuah malila cita . Mangdané jeroné uning titiang kantun truna.

Gelising crita, sang kalih raris alaki rabi ring gunung Batur. Kasuén-suén raris Ida ngamedalang putra, nanging marupa détia (raksasa) kaparabin Ida Sang Maya Danawa. Kacrita mangkin, Kang Cing Wi pageh ida nyantosang rabinidané tan rauh-rauh, raris ida ngetut pamargin ida Sang Prabhu ka Gunung Batur. Kacingak rabiné lulut asih ngajak anak istri jegég. Irika Kang Cing Wi Gedégné tan sipi ngorahang anak istri punika anak luh jalir. Kaucap jalir tan sipi dukan Ida Dewi Danu, raris ida nunggalang adnyana, medal saking nétran ida geni ngabar-abar, nguber Kang Cing Wi kageseng jantos padem.

Nyingak indiké punika Ida Sang Prabu nangis sigsigan “uduh Adi Kang Cing Wi, beli ané ngaba pelihé, ngawinang adi séda buka jani, ampurayang beli, Adi.” Uduh adi Dewi Danu rabin beli, yukti beli ngangken truna ring adi, mangdané sida nganggén adi rabi, duaning tetuek beliné pang sida numbuhang sentana, réh Kang Cing Wi nénten prasida ngawetuang putra. Kala mireng baos rabiné asapunika, tan sipi dukan ida Dewi Danu, marasa kabelog- belog. Raris Ida nunggalang adnyana, medal saking nétran ida geni ngabar-ngabar ngeseng Sang Prabu Jantos séda.

Kacritayang mangkin panjak Ida ring Balingkang, sué nyantos Sang Nata nénten budal, raris panjaké nyerepang Sang Prabu rauh ring gunung Batur. Panjaké kagiat ngeton layon lanang istri. Layoné punika raris kajantenang, nénten wénten tios layon gustiné sujati. Daweg punika nyalantara Ida Déwi Danu, ida raris mabaos ring panjaké sami.” Uduh, paman panjak Balingkang onya, ené gustin paman suba ngemasin séda, apang paman nawang, nira ané ngamatiang sawireh gustin paman pangkah, ia bani melog- melog déwék manirané” Panjaké raris matur sinarengan. “Inggih Ratu, gustin titiang yukti iwang, sané mangkin napi puaran titiangé sami dados panjak iriki ten madué gusti? Ical genah titiang nunas pasayuban. Ida Déwi Danu mawecana. “Yén kéto, baktin pamané saja pesan, paman kalintang subakti tekén gusti. Nah, eda paman kéweh ané jani manira ngicéné paman jalan”Raris Ida Dewi Danu nunggalang Adnyana layon ida sang kalih raris kastawa, Tan pasangkan layon ida maka kalih ical tur manados togog  ageng maraga lanang istri . Togog punika kawastanin barong Landung.