Dharma Wacana Saraswati

DHARMA WACANA

“RAHINA PIODALAN SARASWATI”

Inggih, nawegang titiang mantuk ring :

Para jro mangku sane suciang titiang

Para Guru pangajian sane wangiang titiang

Miwah para sameton lanang istri sane tresnasihin titiang

Ring galahe sane becik puniki, titiang pacang matur samatra, nganinin indik "Rahina Piodalan Saraswati". Sakewanten, duaning tambet titiange kalintang, tan pendah titiang sakadi kunang-kunang anarung sasih, doh jaga prasida nagingin pikayunan Ida-dane sareng sami. Sadurung nglantur, ngiring sareng-sareng nunas ica ring Ida Sang Hyang Widhi Wasa sane miara sarining sastra sangkaning sih asung kerta wara nugrahan Ida iraga prasida mapupul sadu ajeng ring galahe sane becik puniki, malarapan antuk pangastungkara pangayubagia.

 “Om Swastyastu”

Ida dane para semeton sami sane wangiang titiang.

Manut baos sang meraga pawiku, umat Hindune wantah astiti bhakti ring Ida Sang Hyang Widhi, nanging sang meraga wicaksana maosang antuk makudang-kudang parinama. Sinalih tunggil sane kaanggen pinaka Dewi Pencipta Ilmu Pengetahuan wantah Sang Hyang Aji Saraswati. Sakadi sampun kauningin, umat Hindune nyanggra piodalan Saraswati ngenem sasih apisan, ring rahina Saniscara Umanis Wuku Watugunung, sane ketah kebaos “Piodalan Saraswati” pinaka rahina suci utawi rerainan jagat, duaning ring rahina puniki sami umat Hindune ngaturang pangubakti majeng ring Ida Sang Hyang Widhi pinaka upeti utawi pencipta ilmu pengetahuan.

Mangkin titiang maritatas indik pengaturan ilmu pengetahuan sane kabaos Vidya yadnya. Ring Bagawad gita kabaos :

Sreyan dravyamayad yajnaj

Jnayajnah paramtapa,

Sarvam karma khilam partha

Jnane parisampyate

(bhagavadgita I.33)

Teges ipun :

Aturan sane marupa ilmu pengetahuan, pinih utama katimbang aturan arta brana, daging samian indik pekaryan, sami kedasarin antuk ilmu pengetahuan,

Tegarang malih pikayunin, Sane ngawinang para janane sinalih tunggil dados Dokter, Insinyur, Profesor, Bengkel, Tukang, miwah sane lianan wantah sangkaning pasuecan Ida mapaica pangweruhan. Puniki mawinan sareng sami patut nglaksanayang rahina pamijilan pangweruhan, mungguing tatueke wantah ngaturang suksma ring pasuecan Ida Sang Hyang Widhi, samaliha banget mapinunas mangdane nglantur pasuecan Ida, mapaica pangweruhan anggen ngruruh pangupajiwa. Kawruhane wantah utama pisan kawigunannyane ring ngupapira kauripan.

Ida dane sinamian sane kasumayang titiang.

Titiang naenin miragi, mungguing meseh i manuse sane utama wantah katambetan utawi kebodohan. Wit suka dukane wantah katambetan. Sangkaning tambet parilaksana kaon, sangkaning tambet i manusa mangguh kasengsaran. Punika mawinan iraga para anom patut pisan misaratang utawi mautsaha mangdane prasida wruh malarapan malajahang angga ngruruh kawruhan. Ring bagawad gita mungguh kadi puniki :

Tat viddhi pranipatena,

Pariprasnena sevaya,

Upadeksyanti  te  jnanam,

Jnaninas tatvadarsinah.

(bhagavadgita IV.34)

Teges ipun : Malajah kasarengin antuk disiplin, seleg makarya lan subakti ring sang

maraga guru sane uning indik kepatutan, ipun pacang ngajahin iraga indik ilmu budi

pekerti.

Patut pesan kaanggen niasa Dewi Saraswati utawi Dewi cantik sane banget nganyudin mangda stata uleng misaratang pacang ngeniang kawruhan punika, sane nenten telas-telas antuk melajahin, kadi munggah ring gita “Yadin Ririh Enu Liu Pelajahan”, munggah taler ring Niti Sastra kadi puniki :

“Taki-Takining Sewaka Guna Widya,

Smara wisaya rwang puluh ring ayusa,

Tengahi tuwuh san wacana gegen ta,

Patilaring atmeng tanu paguruken.”

(Niti Sastra V.1)

Sane mateges : “Sakantune anom patut mautsaha malajahin sastra, mangda madrue pangweruh kalih gegunan anggen geginan. Yening mituturang indik asmara sesampun matuuh duang dasa tiban. Sesampuna mayusa seket tiban mangda dados penasehat. Sesampune punika patut mikayunin antuk ngelesang Atma ngrereh Moksa”.

Sane kabaos kadi mangkin Masa Muda Masa Belajar sampunang rered malajah sakantun maurip.

Ida dane semeton sareng sami sane wangiang titiang.

Maosang indik agama wantah madasar antuk Tattwa, Susila lan Upacara. Mungguing cihnan iraga maagama Hindu patut malarapan antuk  Upacara, ngastawa ring Ida Sang Hyang Widhi pinaka pencipta ilmu pengetahuan. Indik pamargin tata cara rahinan Saraswati punika kapalihang dados tigang runtutan sane patut sungkemin inggih  puniki.

1.      Rikanjekan rahina Saraswati punika saking semeng jantos pajeg suryane, i raga sareng sami maturan ka sanggah utawi ka mrajan soang-soang miwah mantenin buku utawi lontar druene. Sakewanten sadurung maturan, nunas tirta dumun ring Ida Pranda utawi ring sesuunan ragane soang-soang. Sasampun banten punika kantebang raris kasiratin tirta Saraswati ping lima. Wusan punika wau ragane siratin tirta ping tiga, kaajeng ping tiga, maraup taler ping tiga. Tetujon i ragane nunas tirta Saraswati punika tan lian wantah mangda Ida ngicenin karahajengan miwah kaweruhan sane mautama. Tirta punika taler dados anggen nyuciang raga, ngicalang sakancan kaletehane sane wenten ring ragane, pradene mrasidayang galang apadang ening tan pasing sing.

2.      Runtutan sane kaping kalih wantah masambang semadi. Rikala masambang semadi patut majagra sinambi ngwacen lontar-lontar suci kaagamaan, minakadi: Bagawad gita, Sarasamuscaya, Ramayana, Bratayudha miwah sane lian-lianan. Ring sajeroning sambang semadi punika i raga patut mabrata tan dados mapunyah-punyahan. Tetujon mabrata punika wantah marupa latihan natiagin godaan Sad Ripune, minakadi: loba, irihati, angkara murka miwah sane lianan. Ngwacen lontar tetujon ipun lianan ring marupa tangkis magadang taler nunas kaweruhan ring Ida Sang Hyang Saraswati.

3.      Runtutan sane kaping tiga, inggih punika mabanyu pinaruh risampune awengi majagra, mabrata nglaksanayang sambang semadi. Benjang pasemengan raris mabanyu pinaruh ka beji utawi ka segara masiram tur matirta. Tetujon i raga mabanyu pinaruh wantah nyuciang raga, mangda kaletehane sane wenten ring ragane prasida ical.

Ida dane para pamedek sane kusumayang titiang.

Manawita ida dane sareng sami sampun naenin nyingak lambang Saraswati. Ring simbul punika kasinahang, Ida maduwe tangan kalih pasang soang-soang ngagem ganitri, lontar miwah gitar utawi rebab. Ida ngalinggihin angsa. Irika taler wenten tunjung sane kasanding antuk paksi merak sane dahating asri pakantenannyane. Samian punika marupa simbul sane maduwe arti :

1.      Dewi Saraswati rabin Ida Betara Brahma, nyihnayang simbul kakuatan sane agung saha ngledangin nudut kayun, marupa prabawan sarining kaweruhan.

2.      Gitar utawi rebab punika marupa simbul kabudayan sane maha agung.

3.      Ganitri punika marupa simbul kalanggengan, sane nyihnayang paplajahan punika tan pawates.

4.      Lontar punika marupa simbul kaweruhan.

5.      Angsa utawi sowan marupa simbul kawicaksanan.

6.      Tunjung punika marupa simbul nyihnayang kaweruhan punika makeh soroh ipun tur maha suci.

7.      Merak punika marupa simbul kawibawaan sane nyihnayang sang sampun pradnyan, wicaksana kajananuraga ring jagate.

Ida dane para semeton sami sane tresnasihin titiang.

Wantah asapuniki titiang prasida matur samatra ring galahe sane becik puniki. Titiang wantah rumasa ring padewekan tambet, turmaning menawita kawentenan titiange sekadi nasikin segara, purun prasangga titiang nanginin Ida-dane sane sampun matangi, mawinan mawanti-wanti titiang nunas geng rena pangampura, mogi-mogi ledang arsa ngaksamayang katambetan titiang. Dumadak ida dane sareng sami stata nemu karahayuan, ping untat puputang titiang antuk ngaturang parama santih.

“Om Santih, Santih, Santih Om”