TEKS PANGENTER ACARA

TEKS PANGENTER ACARA

A.    Teges Pangenter Acara

Pangenter Acara inggih punika jadma sane maktayang dudonan acara utawi eedan acara risajeroning acara sane kalaksanayang.

B.     Istilah Pangenter Acara

1. MC (Master of Caremony). Istilah pangénter acara puniki ketah kaanggén ngamargiang acara sakadi acara hiburan.
2. Présénter (HOST). Istilah pangénter acara puniki ketah kaanggén ngwedarang acara sekadi ring acara televisi, wanti warsa sekolah, msl.
3. Penyiar. Istilah pangénter acara puniki ketah kaanggén ngwedarang acara ring radio.
4. Moderator. Istilah pangénter acara puniki ketah kaanggén ngwedarang acara pabligbagan/diskusi, seminar, peparuman.

C.    Tata Cara Makarya Teks Pangenter Acara

1.         Téma. Téma inggih punika unteng pikayunan.

2.         Pamahbah. Pamahbah utawi pendahuluan patut madaging:

a.       Pujastawa, sané ketahnyané nganggén puja pangastungkara.

b.      Matur pangayubagianing manah, panyuksma, miwah swasti prapta.

3.         Daging acara. Dudonan acara sane jagi kalaksanayang.

4.         Pamuput acara. Pamuput acara madaging indik:

a.       Panyuksma antuk uratian sang sané miragiang, sang sané sida rauh miwah sané nagingin acara.

b.      Atur pangampura antuk sahanan kakirangan rikala maktayang acara .

c.       Parama Santih.

D.    Tata Cara Maktayang Teks Pangenter Acara

1. Wirama (pelafalan bunyi, intonasi, miwah vocal)
2. Wirasa (Penjiwaan, etika, estetis)
3. Wiraga (Olah tubuh, ekspresi
4. Wesata (Kemampuan penguasaan kosa kata bahasa Bali)

E.     Sasana Maktayang Teks Pangenter Acara

1. Tata Busana (Pepayasan)

a.       Busana mangda rapi, kapikanten sopan

b.      Busana anutang ring situasi acara

2. Parisolah (Sikap)

a.       Laliat sedek ngraos katiba ring panonton / uleman.

b.      Genah mangda kacingak olih panonton / uleman

c.       Kemikanne / ekspresi muka / wajah ]anutang ring suasana acara

d.      Raose mangda lengut, banban, dabdab anutang ring suasana acara

3. Basa Basita (kebahasaan)

a.       Pangucap krunane mangda tinas (jelas dan tepat)

b.      Pangucap Aksarane mangda tinas (jelas dan tepat)

c.       Tanjek / angsel babaosanne mangda tinas (jelas dan tepat)

d.      Sampunan nganggen kruna-kruna sane nenten lumbrah (umum)

F.  Conto Teks Pangenter Acara

TEKS PANGENTER ACARA

NGÉNTER PAMUSPAYAN

Inggih majeng ring dané jero mangku durusang sampun astawayang bhakti upakara sané sampun munggah.

Inggih Ida Dané para pamedek sareng sami. Titiang saking Penyuluh Bahasa Bali Kabupaten Klungkung. Lugrayang titiang jagi ngénter pamuspayan ring rahinané mangkin. Duaning dané jero mangku sampun puput ngastawayang bhakti upakara ida dané, sané mangkin kramaning sembah pacang kakawitin.

Ngiring asepin riin tangané makakalih, raris sembah kapertama ngaturang sembah puyung. Raris kawitin. Inggih tedun.

Muspa sané kaping kalih masarana antuk sekar nglungsur upasaksi majeng ring Ida Sang Hyang Siwa Aditya. Raris kawitin. Inggih tedun.

Muspa sané kaping tiga masarana antuk kuangén utawi sekar kaangkat uleng bhaktiné majeng ring Ida Bhatara Bhatari sané malinggih ring Pura ............................................ Raris kawitin. Inggih tedun.

Muspa sané kaping empat malih masarana antuk kwangén utawi sekar nglungsur wara nugraha majeng ring Déwa Samodaya. Raris kawitin. Inggih tedun.

Sembah sané pinih untat sembah puyung malih apisan, uleng bhaktiané majeng ring Ida Sang Hyang Widhi sané mapragayang suksma acintya. Raris kawitin. Inggih tedun.

Inggih kramaning sembah sampun prasida puput. Titiang nunas asep sané sampun usan kaanggén mangda kapademang. Majeng ring dané jero mangku miwah pangayah sinareng sami durusang margiang tirta wangsuh pada kalih wija majeng ring para pamedek sinamian.

Atur pakeling titiang majeng ring Ida dané sareng sami, sadurung jangkep sami polih nglungsur tirta wangsuh pada kalih wija, sampunang ngariinin matangi, duaning pamuspayan druwéné pacang kapuputang antuk nguncarang parama santih.

Asapunika taler piranti pamuspayan sané sampun usan kaanggén muspa turmaning nénten mawiguna malih mangda kapupulang riin, malih jebos ritatkala matangi mangda kagenahang ring genah luu sané sampun kasayagayang.

Inggih duaning sami sampun polih ngalungsur tirta wangsuh pada kalih wija, ngiring sané mangkin puputang pamuspayan druwéné antuk nguncarang parama santih. Parama Santih kawitin. “OM SANTIH, SANTIH, SANTIH, OM”. Inggih tedun.

Durusang sampun matangi. Para pamedek sareng sami manawita wénten malih sané jagi ngaturang dana punia, irika ring genah dana punia, sampun wénten pangayah sané pacang nyanggra aturan ida danéné. Suksma.