Reringkesan Geguritan Sampik Ingtai

 Sampik Ingtai

Kacritayang wénten sengke pangkat Mayor, magenah ring Waciu negari, madué pianak mawasta Ingtai Nyonyah utawi Nyonyah Ingtai sané sampun truni utawi menek bajang. Nyonyah Ingtai memanah jagi masekolah ring Angciu Negari, raris nunas mapamit ring biang ajiné. nénten pisan kaicén ring biang ajiné, sakéwanten Nyonyah Ingtai pisereng pisan manahnyané jagi mlajahang raga, nénten prasida biang ajiné ngandeg wiadin nglarang pangacep pianaknyané. Raris Nyonyah Ingtai memargi saha nyineb raga mabusana utawi mapayas sekadi anak lanang.

Rauh ring tengahing margi raris mapanggih utawi macunduk sareng anak lanang sané mawasta I Babah Sampik saking Bociu Negari, ujut tatujoné pateh ring Nyonyah Ingtai jagi masekolah ke Angciu Negari. Irika sareng kalih mapinta tangan utawi makenalan saha sami-sami nyihnayang raga tur sampun ngiket pasawitran tur masumpah ala ayu bareng mati. Kacritayang sané mangkin sang kalih sampun rauh ring Angciu Negari raris nyujur genah sekolahé, gelisang ceritané mangkin, sang kalih sampun katerima dados sisya irika. I Babah Sampik miwah Nyonyah Ingtai mangkin ngrereh dunungan. Sang kalih nyéwa kamar wantah asiki. Ni Ingtai méweh pisan manahnyané santukan ipun mapedéwékan istri utawi luh sirep sareng anak lanang makadi I Babah Sampik. I Nyonyah Ingtai makarya wiwéka makarya uwar-uwar utawi sengkéta, pasirepané kaembadin antuk sabuk utawi kabelatin sabuk mangda nénten keni saling kosod. Gelisang cerita I Babah Sampik tinut pisan ring daging pasengkétané.

Daging pasengkétané sapa sira ja sané ngalintangin ring sabuk punika pacang kakeninin danda marupa kertas, dawat, miwah mangsi pinaka sarana sané kaanggén nyurat duk punika. Raris Ni Nyonyah nyelapang nimpahin I Babah Sampik, punika mawinan ipun kakeninin danda olih I Babah Sampik, Ni Nyonyah Ingtai lascarya manah ipun naur danda ring I Babah Sampik. Nénten kawilangan sampun suényanné sang kalih masawitra, sirep sareng-sareng ngalila ulangun sareng-sareng, sinambi sami-sami nyinahang ipian, masekolah sareng-sareng sakadi anaké masemeton. Kasuén-suén Ni Nyonyah Ingtai nyinahang raga, wusan ipun nyineb raga, sané mangkin ipun nganggé pepayasan utawi busana anak istri. Irika raris I Babah Sampik engsek ring manah, pariselsel ring déwék nénten uning ring kasujatian Ni Nyonyah Ingtai. Ngawit punika raris I Babah Sampik sayan rumaket pasawitrannyané tur ngawiwitin nresnain Ni Nyonyah Ingtai.

Risedek sedeng kaulangunan muponing sarining sekar karasmén, durung waneh I Babah Sampik muponin salulut asih, raris rauh utusan Ni Nyonyah Ingtai sané mawasta I Congliwat mangda Ni Nyonyah mantuk ka Waciu Negari. Duk punika Ni Nyonyah durung nagingin tresna asih nyané I Babah Sampik. Irika raris I Babah Sampik kaliwat bendu ring utusanné Ni Nyonyah tur ngawangun iyeg banget pisan kantos ngawetuang siat. Mresidayang raris Ni Nyonyah munahang kasungkawan I Babah Sampik. Ni Nyonyah jaga mapamit rainané punika, sakéwanten I Babah Sampik kaaptiang mangda rauh mamadik Ni Nyonyah ka Waciu Negari rainané malih dasa dina, kéwanten Ni Nyonyah ping tiga maosang. Indiké punika katampénin malih telung dasa dina olih I Babah Sampik. Gelisang satua rauh reké I Babah Sampik malih tigang dasa dina ngrereh Ni Nyonyah Ingtai ka Waciu Negari. Nénten raris katerima olih Nyonyah Ingtai tur I Babah Sampik katundung santukan kabaos linyok ring semaya. Budal raris I Babah Sampik ka Bociu Kuta tur punika pinaka jalaran nyané ipun sinangkaon utawi sungkan kayun tur ngemasin padem utawi séda. Sakéwanten prasida taler I Babah Sampik sareng Ni Nyonyah Ingtai matemu saling tresnanin ring niskala.

Duk Ni Nyonyah sampun mamargi sajeroning upacara pawiwahan sareng I Bandar Macun, ring tengahing margi tedun ajebos ring kuburan I Babah Sampik raris sembahyang ring ajeng kuburan I Babah Sampik. Raris belah kuburan punika ngranjing Ni Nyonyah malih atep kuburan punika. Wawu kuburan punika keni kabongkar olih kulinnyané I Macun, Ni Nyonyah sareng I Babah Sampik nénten kakeniang, sakéwanten wénten praciri kupu-kupu kalih makeber nyujur suargan. Atman sang kalih rauh ring suargan malinggih ring méru tumpang selikur kaayahin olih watek widyadariné, rena manahnyané ring suargan.