PIDARTA PERPISAHAN SEKOLAH

 PIDARTA PERPISAHAN SEKOLAH

Om Swastyastu

Sane dahat wangiang titiang Kepala Sekolah

Sane Wangiang titiang para guru

Sane kusumanyang titiang reraman sisia sareng sami

Miwah sane tresna asihin titiang sawitran titing ring SD …………..

Asung kerta wara nugraha titiang aturang majeng ring Ida Sang Hyang Widhi Wasa, santukan sangkaning paswecan Ida, iraga prasida mapupul ring galahe sakadi mangkin. Ring galahe mangkin wenten sane pacang aturang indik parikrama Perpisahan rahinane mangkin. 

Ida dane sane wangiang titiang, kapertama titiang ngaturang suksma majeng ring para guru sane sampun ledang ngicenin ajah-ajahan ring padewekan titiang. Bapak Ibu Guru sampun satata semangat ngicenin titiang kaweruhan indik ajah-ajahan, indik maparilaksana sane becik, miwah sane siosan. Ayah-ayahan bapak ibu guru sane sampun kaicayang nenten sida antuk titiang ngengsapang. 

Tan lali titiang ngaturang agung rena pangampura ritatkala wenten parilaksanan titiang rikala masekolah iriki wenten ten manut ring arsa bapak ibu guru. Selanturnyane titiang tetep pacang nglungsur doa majeng ring bapak ibu guru sareng sami, dumogi sakancan kaweruhan sane sampun titiang kaicenin mawiguna ring kauripan titiang. Minakadin ipun pacang kaanggen ngrereh sekolah selanturnyane ring genah SMP. Malih pisan suksma sampun ngicenin titiang paplajahan miwah sampun sabar rikala ngicenin titiang ajah-ajahan.

Majeng ring para rerama titiang taler ngaturang suksma sampun sida nukung titiang rikala masekolah. Sampun prasida ngatehang titiang, ngicenin titiang bekel, nampingin titiang rikala ngarya PR, akeh sampun kabuatang ring padewekan titiang manados titiang sakadi mangkin pacang lulus masekolah. Titiang tresna tekening meme lan bapa. Titiang nunas mangda meme lan bapa nenten surud-surud ngwantu titiang rikala kantun nglaksanayang masa brahmacari asrama, manados cita-cita titiang prasida kapanggih.

Majeng ring arin titiang ring kelas 1 ngantos 5, mangda satata seleg malajah, sampunang bes akeh ngrepotin guru, semangat malajah mangda prasida gelis manggihin cita-cita. Titiang ngwakilin kelas 6 nunas ampura taler yening wenten parilaksana ring arin titiang sane ten manut ring kahyun.

Ida dane sane kusumayang titiang, wantah sakadi punika prasida aturang titiang, dumogi wenten pikenohipun. Yening wenten kaiwangan titiang rikala matur-matur titiang nglungsur agung rena sinampura. Puputang titiang antuk parama shanti.

Om Shanti Shanti Shanti Om