Kung, Kalaraning Kung
“Bli ampurayang tiang, boya ja sangkaning tresnan tiangé ilang, ulian suba tusing ngidaang tiang ngisiang keneh. Suba dadi luhu tiang bli, tusing nyandang tiang nyarengin bli malih. Ampurayang tiang bli.”
Ngejer tanganné Déwa Brata ngwacén surat saking gegélanné, Déwa Ayu Ari. Macepol kadirasa tangkahné ngwacén isin keneh gegélanné. Risampuné sinamian jangkep, semeton sampun sami sayaga, sampun nunas tulung sareng kulawarga, pisaga miwah sawitrané sami, sane mangkin gegélanné matilar. Napi wénten sané iwang? Wénten napi Ayu ari nadaksara megatin tresna?, malinggih Déwa Brata ring tegakan sané maulat aji tiing, tan karasa ngetél yeh panyingakanné. Lara duhkitané tan sipi, jengah miwah gedeg macampuh masikian ring tengahing ati. Samian sampun sayaga ring puri santukan ring rahinané benjang wantah pawiwahané Déwa Brata miwah Déwa Ayu Ari.
“Kénkén cening, ngudiang ngeling?, ayu ari dija? surat apa ento?”Biangné Déwa Brata matakén saha ngamel tangan okanné.
“Buung suba tiang ngantén bu, Ari suba malaib. Sing nyak ngantén ajak tiang. Depang suba, mulih orahin makejang! mulih! pesuu…pesuu..tiang sing ja lakar ngantén kanti mati. meeggeedddiiiii…….
Mojar Sang Déwabrata, pratijna mami rengonta: tan ikang kadatwan juga tinggalkna ni nghulun, ikang wisaya stri tinggalakna ya. Mangké tambayan i nghulun brahmacarya.
Anginné ngasirsir alon, ngampehang manah osah nandang duhkita. Bintangé ring ambarané matilar nundun bulan sané sampun nénten prasida masunar. Peteng dedet jagaté mangkin, pateh sakadi keneh anaké lanang sané sedih kingking nangisin smarané sané matilar. Suraté punika malih kawacén, raris kagenahang malih ring méjané. Asuné ngongkong, uyut ngebekin kuping. pateh sakadi raos pisagané sané pakrimik uyut ring jaba, sané ortaanga wantah asiki, Déwa Brata buung ngantén, Déwa Brata katinggalin olih tunangané, Déwa Brata masumpah nénten lakar ngantén. Sebet pisan Déwa Brata mireng pisagané pakrimik kadi punika. Kadirasa ngedékin, ngényorin miwah seneng yéning wénten anaké sakadi Dewa Brata sané sampun kadi bangké matah katinggalin olih Déwa Ayu Ari. Ring carita Bharatayudha, Bhisma utawi Déwabrata masumpah jagi nyukla brahmacari mangda prasida Sang Santanu, ajinidané majangkepan sareng Sang Gandhawati sakéwanten Déwa Brata sané niki lian, masumpah jagi nyukla brahmacari sangkaning jengahné tan sipi, brangti, miwah sedih kingking osah mulisah ngenehang kung smarané matilar ical.
Punggelan carita cendet (cerpen) pakardin Dewa Ayu Carma Citrawati
Tidak ada komentar:
Posting Komentar