Puisi Bali "Atma Kerthi-Udinana Purnaning Jiwa"

Udiana Purnaning Jiwa

Ring madianing sepi sane mautama

Wenten taman nenten kacingak mata

Udiana Purnaning Jiwa...

Genah Atmané malajah nunggal

Ngruruh galang ring telenging puyung.

Boya ja wantah bebantenan ring sanggah

Boya ja tuah kidung sane ngebekin jagat

Atma Kerthi puniki laksana suci

Ngumbah daki ring jeroning budi

Nunas tirta saking kanda pat sane murni.

Ring taman puniki...

Sekar bakti katanem antuk satya

Don-donan dharma dados panyayung raga

Nenten wenten malih drowaka sane nyakitin

Nenten wenten malih loba sane ngiket keneh

Samian purna, mawali ning ring suci.

Purbane mulih ring paraning dadi

Jiwané mumbul ngrerot ring ambarane

Nilarang raga sane dadi daki gumi

Nuju sunia, nuju purnaning jati.

Bulan Bahasa Bali...

Dados galah nyuratang aksara suci

Ring kropak manah sane puyung

Mogi Atma Kerthi prasida nuntun margi

Ngajegang jagat, ngulati purnaning jiwa.

Majalan melaib nuju suter,

Singgah malali nuju kintamani.

Manah suci nenten ja pager,

Udiana purnaning jiwa nuntun bakti.

Olih: I Made Murtika, S.Pd

ENTEG BAYU

 

Kalahin tyang jiwa

Sane kantun maebahan ring pasirepan

Anggan tyang mawali malih

Nyalanang swadarma ka jati mula

 

Ngantosang sapangrawuh yayahrena iburena mulih,

Malih…. ….

Malih, tyang mamargi nututin lawat-lawat

Ngundukang rasa ne katuju

 

Sadurung rasa seduk niki rauh

Satonden rasa kiap teka

Nyagjagin endag surya

Enten…enten…

Entenang ragane…

Olih: I Putu Oka Sugiantara, S.Pd

Galang ring Telenging Ati

Ening kahyun, ening sang atma,

Ngardi bagia ikanang jadma,

Sakadi saking kelebutan toya,

Ngicalang mala ring angga sasira.

Nenten ja arta sané nuntun keneh,

Nanging bhakti sané satya nunggaling nala,

Yening budhi sampun suci nirmala,

Laksana luih sidha ka parisudha.

Mantra masuara, genta mangening,

Nuntun jiwa ngruruh suksmaning sunia,

Ring sajeroning sepi, galang punika nampak,

Pinaka sasuluh nglaksanayang swadarma.

Rikala maurip dados manusa,

Ngiring suciang sang atma,

Mangda galang ring telengin ati,

Antuk bhakti ring sang sunia,

Olih: I Wayan Adi Upadana, S.Pd.B., M.Pd

GENTA PANUNTUN JIWA

Ring selagan sepi sane masuara,

Titiang bengong, nlektekang lawat bayu,

Ngulati sunia ring madyaning rupa,

Ngruruh galang ring telenging ati.

Mantra Tri Sandhya nyisip ring nala,

Kadi tirta sane ngetisin raga,

Ngicalang leteh, ngicalang kroda,

Ngentungang loba sane ngiket angga sasira.

Eling ring dewa, eling ring raga,

Nelebang kahyun subhakti ring Ida,

Ngawe ening suci nirmala,

Malarapan genta sane nuntun jiwa.

Ening kahyun, ening sang atma,

Sareng jiwa ngruruh suksmaning sunia,

Pinaka panyuluh swadarma manusa,

Rikala kantun maurip ring mrecapada.

Olih : I Wayan Adi Upadana, S.Pd.B., M.Pd