Puisi Bali

BASA BALI

Ring aab jaman globalisasi

Sane aor tanpa tepi

Jati lingu I krama Bali

Tan éling ring basa Bali

            Ulian lali ring basa Bali

            Mawastu rered budaya Bali

            Tradisi sayan nguredang ring Bali

            Sastra Bali sayan arang kapanggihin

Ngiring sané mangkin

Tangiang ring dewek padidi

Malih nguripang basa Bali

Mawastu ajeg lan lestari

Olih: I Wayan Adi Upadana

LUU PLASTIK

Cemer palemahané

Kacemer olih luu plastik

Pertiwiné nangis tan subur

Tetanduran méweh maurip

Antuk punika né mangkin

Ngiring dabdabin luu plastik

Kadaur ulang dados kerajinan

Sané maguna ring para janané

Sida resik palemahané

Ngawinang girang manah pertiwininé

Tetanduran pacang subur

Jagaté sinah asri lan lestari

Olih: I Wayan Adi Upadana

RIKALA SEMENG

Endag suryané kangin

Kasambutin olih crukcuk mangunci

Pakruyuk suaran siapé

Damuh ring tetaruan nganyudang manah

            Parajanané sampun matangi

            Nyadia pacang ngamargiang swadarma

            Wénten sané nuju pasar

            Para sisya nuju sekolahan

Sinar matanai anget manyunarin

Udara bresih bebas saking polusi

Rikala semengé puniki

Mogi suéca Ida Hyang Widhi

Micayang karahayuan

Ring sarwa mauripé sami

LAYAH

Tuah saja aluh ban mamunyi

Layahé saja tanpa tulang

Satata mabaos manis

Sakéwanten tuna ring laksana

            Slap slep layahé kanggén mabaos

Nuturang kajelekan anak tiosan

Ngawé gatra sané tan manut

Ngawinang byuta ring jagaté

Ngiring becikang makta layahé

Tri Kaya Parisudha anggén tuladan

Wacika kaanggén dasar

Mapineh malaksana sané luih

Tur kajiwa pramanain

Antuk sastra lan ajahan agama

Olih: I Wayan Adi Upadana

KEMBANG RAMPÉ

Don pandan lakarnya

Kageet sakadi rambut

Miik ngalub ngulangunin

Kaanggén sarana bhakti

Katur ring Hyang Widhi

            Kembang rampé wastannya

            Kagenahang ring tengah pangider canang

Pinaka niasa brumbun ngawé kawicaksanan

Kanggén wiweka ring warnining kauripan

Mangda sida ngamolihang

Kasukertan jagat shanti lan jagathita

Olih: I Wayan Adi Upadana

GRING KORONA

Puyeng .........Stressss .........
Sirah tiange jani
Uleh-ulehane suba telah
Pesu tuara dadi
Ulian gring korona

Aab jagate cara jani
Korona ngaenang idupe keweh
Ngusak organ angga manusa
Ngaenang sesek di tangkah
Makadi ngemasin mati

Jalan jani masikian
Nuutin arahan pemerintah
Satata ngumbah lima
Nganggon masker yen lakar pesu
Dumadak sweca hyang Widhi
Gring Korona enggal ilang

Olih: I Wayan Adi Upadana