KATUTURANG SANG ARYA DHARMA

 MATERI KELAS X

MEMBUAT NASKAH GEGURITAN DARI NASKAH SATUA BALI

 

KATUTURANG SANG ARYA DHARMA

Mituhu Pituturipun I Kambing

      Kocap duke riin wenten Prabhu jumeneng Nata ring Swetanegara, ida maparab Sang prabhu Aji Dharma. Ring rahina sane becik ida maboros ka alasa Lebak Tawa tepi siring jagatidane, kairing antuk para tanda mantrin, Baudanda lan panjak idane taler akeh nyarengin. Busananida wiakti tegep, makampuh sutra selem bebuatan Jawi, tepinnyane paputakan, yuakti ngreneb antuk mas sesocan kadi bintange ring langite. Nika sane ngawinang kadaut manah para istrine ring Swetanegara ngaton warnin Ida Sang Prabhu.

      Sarauh ida lan tanda mantrine ring alas Lebak tawa, yukti kagiat sahananing satone, malaib patipirug, wenten sane keni katimpug, kajaring kaejuk olih parekane jaga kaanggen rayunan sakadi, tum, lawar, sesate miwah sane lianan. Duaning asapunika dahat ledang pakayunanida raris nglanturang mamrgi nuutang eloan tukang suktine yuakti ngulangunin antuk kesiran angine kadi ring tepi siring segara kalawan girine, ngenenin sariran Ida sang Prabhu, kadulurin antuk ambun sekar gadunge sane miik sumirit.

      Antuk kalanguan kayunidane ring margi tan dumade manggihin ula deles makrida ring Naga Gini Dewi putran Sang ananta Boga. Kapikayun antuk ida indike puniki angapa krma, ngletehin jagat, irika sahasa ida mademang ula deles lan Naga Gini taler keni katigtig ring taru tangine. Naga Gini raris malayu ka sapta Patala, matur ring ajine Sang Ananta Boga, kanikayang sang Prabhu Aji Dharma Wirosa makayun mlegandang anggan idane ring alas Lebak tawa. Sang Ananta Boga raris nyuti rupa dados ula alit mamrgi ka alas Lebak Tawa, praya nyedayang Sang Prabhu Aji Dharma.

      Sarauh Sang Ananta Boga ring alas Lebak Tawa, kapanggih Sang Prabhu risedek malinggih ring batune asah, katangkilin antu tanda mantrinida, tur nganikayang kosekan kayunne, antuk parilaksanan Ula Deles lan Naga Gini makrida anggapa karma tan manuting sasana ngletehin jagat. Kapireng asapunika pangandika Sang Prabhu raris Sang Ananta Boga mapaica wara nugraha ring ida sang prabhu. “Uduh Dewa Sang Maha Prabhu” antuk kalintang wicaksana I Dewa ngambel jagat. Jani bapa ngicenin I Dewa waranugraha, apang I Dewa wikan ring sahananing suaran satone sami, nanging kalintang singid. Wusan ida ngicen waranugraha raris ical mawali ka naga loka. Irika Sang Prabhu masiram tur mabusana raris mawali ka Swetanegara, kairing antuk tanda mantrinidane sami.

Karingkes saking Crita Tantri

GEGURITAN SANG ARYA DHARMA

Pupuh Ginada Kocap wènten Prabhu Nata, Aji Dharma kaparabin, Maboros ka alas lebak, Magenah ring tepi siring, Jagat idanè kaloktah, Lintang becik, Ring jagat Swètanegara.   Pupuh Ginanti Caritayang mangkin iku, Prabhu Aji Dharma yukti, Tanda mantri nè ngiringang, Panjak taler manyarengin, Wyakti tegep bhusanannya, Kampuh sutra bwatan Jawi.   Pupuh Maskumambang Payas ngreneb antuk mas sesocan yukti, Raja mawibawa, Kadi bintang maring langit, Istrinè kadaut manah.

Kocap duke riin wenten Prabhu jumeneng Nata ring Swetanegara, ida maparab Sang prabhu Aji Dharma. Ring rahina sane becik ida maboros ka alasa Lebak Tawa tepi siring jagatidane, kairing antuk para tanda mantrin, Baudanda lan panjak idane taler akeh nyarengin. Busananida wiakti tegep, makampuh sutra selem bebuatan Jawi, tepinnyane paputakan, yuakti ngreneb antuk mas sesocan kadi bintange ring langite. Nika sane ngawinang kadaut manah para istrine ring Swetanegara ngaton warnin Ida Sang Prabhu.

 

 

Amlapura, 15 Pebruari 2021

I Wayan Adi Upadana, M.Pd