Calonarang

 CALONARANG

Kacaritayang duk Prabhu Airlangga madeg nata ring Kadiri raja, wénten bencana gebug gering ring wewengkon idané. Panjak idané busan-busan gelem tur ngemasin padem. Semengan gelem, tengai mati, sanja mataneman, kénten sarahina-rahina. Indiké puniki ngawinang Prabhu Airlangga patitakén ring pangabih idané, napiké sané ngawinang kahanan puniki? “Paman,

Paman Patih Sudarsana, ngiring mrika ajebos cingakin ja panjak-panjaké napiké ngawinang wénten gatra kaon puniki,” ucap Prabhu Airlangga.

Ki Patih Sudarsana sané taler jerih ring kahanan jagat Kadiri puniki, wantah prasida tinarima préntah saking Ida Sang Prabhu, nglantur mamargi nuréksain kahanan ring jaba. Pamargin Ki Patih Sudarsana nglintangin désa-désa sawewengkon Kadiri. Wénten rasa jejeh, wénten rasa tengkejut, wénten rasa sedih, nyingakin panjak-panjak Kadiri rajané pajelempang keni grubug lan gering. Wau tatas uning, ri kala Ki Patih nglintangin désa sané mawasta Dirah.

Ring désa Dirah kacaritayang wénten anak istri mawasta Rangdéng Dirah, dané madué putri asiki maparab Diah Ratna Manggali. Putrin danéné ayu pisan, sakéwanten ngantos Ratna Manggali bajang mempeng, durung wénten anak lanang sané kayun nglemesin putrin danéné. Santukan, manut orti sané kawedar Rangdéng Dirah wantah ratu désti, amuja-muji Ida Bhatari Durggha, lan madué sisya-sisya sané nyabran tengahing wengi lunga ka sétra. Ring sétrané Rangdéng Dirah lan sisyan-sisyannyané mangigel, dangklang-déngkléng, makalung basang-basang, anelek baga, lan kaik-kaik. Nadak sara kesyar-kesyer guminé, angin ngampehang sisan-sisan désti, nelusup kaumah-umah krama, lan ngawinang pejah.

Kahanan puniki kanikayang ring Ida Sang Prabhu Airlangga. Bendu pisan pikayunan idané ri kala mirengang gatra sané kabakta olih Ki Patih Sudarsana. Makakalih makarya rarincikan mangda sida ngasorang Rangdéng Dirah lan ngwaliang jagat Kadiriné landuh, trepti, rahayu.

“Paman Patih, gelah meled ngutus Mpu Bharadah mangda mrika maperang sareng Rangdéng Dirah.”

“Uduh, Ida Sang Prabhu, yéning makayunan ngasorang Rangdéng Dirah sampunang maperang, sakéwanten anggén rarincikan sané sinahnyané becik.”

“Napi nika Paman?”

“Nikain murid saking Mpu Bharadah sané mawasta Mpu Bahula mangda kayun dados suami saking Ratna Manggali.”

“Men kudiang lantas Paman, tusingké nyanan Mpu Bahula matianga.”

“Pastika nénten, santukan Mpu Bahula pacang kabekelin rarincikan mangda Diah Ratna Manggali tresna leket rumaket ring Mpu Bahula.”

Ring taman sané madaging telaga, bunga-bunga nénten kayun kepat nyaksinin sungsut manah Diah Ratna Manggali. Ri kala don-donan layu ulung saking carangnyané. Sakéwanten di selag-selagan padang ambenganné, Mpu Bahula ngrauhin Ratna Manggali. Makesiab Ratna Manggali, nanging manahnyané sampun kadaut olih tutur manis Mpu Bahula. Gelisin carita, makakalih lantas marabian. Mpu Bahula meneng ring Désa Dirah.

I rika wau tatas uning Mpu Bahula ring kawéntenan padéstian sané kaduénang olih Rangdéng Dirah. Majalaran saking Ratna Manggali, lontar-lontar padéstian sané kaduénang Rangdéng Dirah kaambil lan kapralina olih Mpu Bahula. Uning ring kahananné punika, lantas Rangdéng Dirah kroda. Mpu Bharadah rauh ka padukuhan Dirah, mélanin Mpu Bahula. Mpu Bahula lan Ratna Manggali matilar saking Dirah. I rika wantah Mpu Bharadah lan Rangdéng Dirah sané perang tanding. Rangdéng Dirah lan Mpu Bharadah kabaosang rwa bhineda ring kauripan puniki. Anaké embas sampun jangkep becik lan kaonnyané.

 

Kaketus Saking Katattwan Calonarang